नाशिक – जिल्ह्यातील धार्मिक व ऐतिहासिक वारसा जतन करण्यासोबतच तीर्थक्षेत्रांचा नियोजनबद्ध विकास करण्यावर शासनाचा भर आहे. इगतपुरी तालुक्यातील कावनई येथील कपिला तीर्थक्षेत्राच्या विकासासाठी आवश्यक ती सर्वतोपरी मदत केली जाईल, अशी ग्वाही जलसंपदा मंत्री तथा पालकमंत्री गिरीश महाजन यांनी दिली.

पालकमंत्री महाजन यांनी कावनई येथील कपिला तीर्थक्षेत्राला भेट दिली. यावेळी त्यांनी तीर्थक्षेत्राची पाहणी करून परिसरातील विकासकामांच्या अनुषंगाने माहिती घेतली. या भेटीदरम्यान तहसीलदार अभिजित बारवकर, महंत फलहारी बाबा, संस्थानचे विश्वस्त यांच्यासह विविध विभागांचे अधिकारी उपस्थित होते.

कावनई येथील कपिला तीर्थक्षेत्राला धार्मिक आणि आध्यात्मिक महत्त्व आहे. तीर्थक्षेत्राच्या विकासातून परिसरातील धार्मिक पर्यटनाला चालना मिळण्यास मदत होऊ शकते. त्यामुळे या परिसरातील आवश्यक सुविधा विकसित करणे, तीर्थक्षेत्राचे महत्त्व जतन करणे आणि भाविकांना अधिक चांगल्या सुविधा उपलब्ध करून देणे या बाबींना महत्त्व आहे.

तीर्थक्षेत्राच्या सर्वांगीण विकासासाठी आवश्यक त्या बाबींचा विचार करून शासन स्तरावर सहकार्य करण्यात येईल, असे पालकमंत्री महाजन यांनी सांगितले. कपिला तीर्थक्षेत्राचा विकास करताना धार्मिक महत्त्व आणि परिसराचे वैशिष्ट्य जपण्याबरोबरच भाविकांच्या सोयी-सुविधांनाही प्राधान्य देण्यात येईल, असेही ते म्हणाले. यावेळी महंत फलहारी बाबा यांनी पालकमंत्री महाजन यांना सिंहस्थ कुंभमेळ्याचे निमंत्रण दिले.